Frétt - 17.11.2017

Þeistareykjastöð gangsett

Í dag er Þeistareykjastöð formlega gangsett við hátíðlega athöfn. Stöðin verður 90 MW að aflgetu og er þriðja jarðhitavirkjun Landsvirkjunar. Mannvit hefur séð um verkefnastjórnun fyrir ráðgjafa ásamt mati á umhverfisáhrifum, hönnun tengivirkis og háspennulína ásamt borráðgjöf, holutoppshönnun, boreftirliti og mat á stærð jarðhitasvæðis. Mannvit og Verkís, unnu að hönnun virkjunarinnar og gerð útboðsgagna ásamt því að veita fageftirlit með hönnun, uppsetningu og gangsetningu vélbúnaðar, rafbúnaðar og stjórnbúnaðar. Mannvit og Verkís sáu einnig um hönnun stöðvarhús, gufuveitu og stoðkerfa sem hluta af heildarhönnun virkjunarinnar. Tark og Landslag voru einnig hluti af ráðgjafateymi við hönnun og undirbúning virkjunarinnar.

Borunum fyrir jarðgufu lauk í ágúst sem tryggja nægjanlega orku fyrir 90 MW. Boraðar hafa verið 10 holur á síðustu tveim árum, þar af ein í Kröflu, og er heildarfjöldi borholna á Þeistareykjum orðinn 18. Vélasamstæðurnar eru framleiddar og uppsettar af Fuji Electric og Balcke-Durr. Fyrri vélasamstæðan verður afhent Landsvirkjun til rekstrar 1. desember 2017 og seinni vélasamstæðan fer í rekstur 1. apríl 2018.

Mannvit óskar Landsvirkjun og Norðlendingum til hamingju með glæsilega aflstöð með þökk fyrir samstarfið.