Hótel Marriott Edition og íbúðir

Mannvit hefur á undanförnum árum verið að þróa hótel- og íbúðasvæðið við hlið Hörpu tónlistar- og ráðstefnuhúss.  Svæðið er hluti af endursköpun gamla hafnarsvæðisins í hjarta borgarinnar og býður upp á útsýni yfir Esjuna og önnur kennileiti í nágrenninu. 

Framkvæmdir á lóð Marriott EDITION hótelsins og nærliggjandi íbúðarhúsnæðis- og verslunarlóð eru hafnar. Heildarfjárfesting verkefnisins er áætluð um 14 milljarðar króna en í heild verða rúmlega 250 herbergi í hótelinu auk 90 íbúða og verslana í þeim fimm byggingum sem verða reistar næst hótelinu. „Hér erum við að feta okkur inn á nýja braut sem verkfræði- og tæknifyrirtæki með því að halda utan um allt verkefnið frá upphafi til enda, þ.e. kaup á lóð, tilboðsgerð, fjármögnun, samningagerð við hótelrekanda, hönnun, útboð, innkaup, byggingastjórnun, eftirlit og afhendingu mannvirkis“, segir Tryggvi Jónsson, framkvæmdastjóra mannvirkja.

Mannvit sér um verkefnastjórnun og heildarumsjón verkefnisins ásamt T.ark teiknistofan arkitektar. Lóðin er 7.458 m2 að stærð og er merkt sem reitur númer 5. Leyfilegt er að byggja 28.500 m2 ofanjarðar og 4.500 m2  neðanjarðar. Reiknað er með því að framkvæmdin skapi ríflega 200 ný störf og um 150 starfsmenn vinni á hótelinu sjálfu þegar það er komið í rekstur.

Hótel Reykjavík EDITION
Hótelið við Austurhöfn er ætlað sem ráðstefnuhótel fyrir Hörpu, tónlistar- og ráðstefnuhúsið í Reykjavík. Það verður fyrst flokks hótel á vegum EDITION sem er lúxuskeðja á vegum Marriott International. Marriott Ed­iti­on hót­el­in eru svo­kölluð „bout­ique“ hót­el þar sem hvert þeirra er hannað á sinn hátt. Hótelið verður á sex hæðum og kjallara og um 16.500 m2 að stærð með 250 herbergi, veitingastað og bari, fundarherbergi, veislusal, heilsulind og önnur þægindi sem hæfa 5 stjörnu hóteli. Við hlið hótelsins verður 21 stæðis bílakjallari sem mun tengjast bílakjallara Hörpunnar og nýta innkeyrslu með honum. Banda­ríska fyrirtækið Carpenter & Comp­any á bygg­inga­rétt­inn og mun fjár­magna fram­kvæmd­ina ásamt Eggerti Dag­bjarts­syni. Gerður hef­ur verið langtíma samn­ing­ur við Marriott Ed­iti­on um rekst­ur­inn.

Íbúða- og verslunarbygging
Byggingin er staðsett við Austurbakka hafnarsvæðisins í miðbæ Reykjavíkur við hlið hótelsins og er þróunarverkefni á vegum Mannvit, T.ark og Arion banka. Byggingin sem verður um 16.500 m2 samanstendur af jarðhæð sem liggur meðfram götunum þremur í kringum lóðina, Austurbakki, Geirsgata og Reykjastræti. Megnið af jarðhæðinni er ætlað fyrir verslanir og veitingastaði. Yfir jarðhæðinni eru fimm hæðir af íbúðum í fimm aðskildum kjörnum. Þeir móta húsagarð sem er aðskilinn frá nærliggjandi götum og er ætlaður íbúum.  Bílakjallari og geymslur eru svo staðsettar í kjallara. 

Verksvið

  • Hönnun
  • Innkaupastjórn
  • Byggingarstjórn
  • Verkefnisstjórn
250
Hótelherbergi
7.458 m2 
Lóðarstærð
16.500 m2 
Íbúða og verslunarhúsnæði

„Það hefur verið krefjandi og skemmtilegt að koma að hönnun og byggingu fyrsta lúxushótelsins á Íslandi, sem býr til nýjan gæðaflokk í hótelgistingu en vöntun hefur verið á honum hérlendis. Íbúðirnar og hótelið ásamt fyrirhuguðu torgi og göngugötu skapa tengingu milli Hörpu og miðborgarinnar og spila stórt hlutverk í endurnýjun hafnarsvæðisins.“

Gunnar Páll Stefánsson

Verkefnisstjóri

Play

Harpa, tónlistar og ráðstefnuhús