Harpa, tónlistarhús og ráðstefnumiðstöð

Harpa, tónlistarhús og ráðstefnumiðstöð Reykjavíkur var tekin í notkun í maí 2011. Mannvit gegndi veigamiklu hlutverki í verkfræðihönnun og byggingu Hörpunnar og var hluti af Portus hópnum sem átti verðlaunatillögu í hönnun hússins ásamt verkfræðistofunum Ramböll og Hnit. Henning Larsen Architects og Batteríið arkitektar teiknuðu húsið ásamt Ólafi Elíassyni listamanni. ÍAV voru al-verktakar hússins. Mannvit sá um skipulagningu og hönnun á öllum rafkerfum, gerð útboðsgagna, umsjón með útboðum og mat tilboða í samvinnu við Ramböll. Mannvit sá jafnframt um hönnun burðarvirkja, lagna, loftræstingar, rafkerfa og brunatækni ásamt Ramböll. Burðarvirki hússins eru flókin og vandasöm í hönnun sem gerð var í þrívídd. Þrívíddarhönnun í BIM (Building Information Modelling) hugbúnaði hefur rutt brautina í notkun upplýsingalíkana við mannvirkjagerð.  Harpa er fyrsta stóra verkefnið á landinu þar sem notað er upplýsingalíkan við alla verkfræðihönnun.

Mjög miklar kröfur eru gerðar til hljóðvistar í húsinu. Meðal annars er tónlistarsalurinn skilgreindur sem N1 salur, en það er hljómburðarflokkun og aðeins eru örfáir slíkir salir til í heiminum.  Allur loftræstibúnaður og pípulagnir eru einangraðar frá burðarvirki hússins með gorma- eða gúmmíupphengjum.  Flest tæknirýmin eru "box-í-box" herbergi, þ.e. innan í rýminu er annað rými með veggjum, gólfi og lofti sem er aðskilið ytra rýminu með holrými eða neoprenpúðum.

Verksvið

  • Burðarvirkishönnun
  • Lagna- og loftræstikerfi
  • Skipulagningu og hönnun rafkerfa
  • Gerð útboðsgagna og mat tilboða
  • Brunatækni
  • Götur
  • Veitulagnir
28.000 m² 
Stærð
4.000 tonn 
Bendistál
6.000.000 tonn 
Sjó dælt úr grunni

Harpan er 28.000 fermetrar að stærð og 43 metra há. Botnplata hússins er um 8.000 fermetrar og í húsið fóru samtals um 2.500 tonn af burðarstáli og 4.000 tonn af bendistáli. Úr grunni hússins var mokað í burtu á annað hundrað þúsund rúmmetrum af jarðvegi og um sex milljónum tonna af sjó var dælt upp úr grunninum á meðan framkvæmdum stóð. Heildarloftmagn loftræstikerfa hússins er um 375.000 m³/h.

Play

Harpa, tónlistarhús og ráðstefnumiðstöð