Frétt - 22.03.2017

Fyrirmyndarfyrirtæki í stjórnarháttum 2016-2017

Rannsóknarmiðstöð í stjórnarháttum hefur veitt Mannviti viðurkenningu sem Fyrirmyndarfyrirtæki í góðum stjórnarháttum 6 árið í röð. Viðurkenningin var veitt á ráðstefnu Rannsóknarmiðstöðvar um góða stjórnarhætti í Hörpu 21 mars 2017. Viðurkenningin er fyrst og fremst veitt til þess að ýta undir umræður og aðgerðir sem efla góða stjórnarhætti og er veitt þeim fyrirtækjum sem hafa farið í gegnum formlegt endurmat á stjórnarháttum. Markmiðið er að matsferlið auki trúverðugleika og gagnsæi stjórnarhátta fyrirtækja gagnvart hluthöfum og öðrum hagsmunaaðilum.

Rannsóknarmiðstöð um stjórnarhætti við Háskóla Íslands er umsjónaraðili verkefnisins en viðurkenndir úttektaraðilar sjá um framkvæmd. Leiðbeiningar um góða stjórnarhætti eru gefnar út af Viðskiptaráði, Samtökum atvinnulífsins og Nasdaq Iceland. Þau fyrirtæki sem standast matið á framangreindum forsendum er veitt nafnbótin Fyrirmyndarfyrirtæki í góðum stjórnarháttum (e. Excellence in corporate governance). Ásamt Mannviti veittu níu önnur fyrirtæki viðurkenningunni móttöku, þau eru: Isavia, Stefnir, Arion banki, Reitir, Landsbankinn, Marel, Eik fasteignafélag, Fjarskipti og Íslandsbanki.

Hér er að finna lista yfir öll fyrirtækin sem hlutu viðurkenninguna að þessu sinni.