Góðir Stjórnarhættir 2021
Frétt - 23.08.2021

Viðurkenning á góðum stjórnarháttum

Mannvit hefur hlotið viðurkenninguna Fyrirmyndarfyrirtæki í góðum stjórnarháttum fyrir árið 2021. Viðurkenninguna veitir Stjórnvísi fyrir hönd Viðskiptaráðs Íslands, Samtaka atvinnulífsins og Nasdaq Iceland stjórnum fyrirtækja fyrir góða stjórnarhætti. Sigurður Sigurjónsson stjórnarformaður Mannvits veitti viðurkenningunni móttöku þann 20.ágúst ásamt stjórnarformönnum fyrirtækjanna sem einnig hlutu viðurkenninguna að þessu sinni.

Viðurkenningin byggir á úttekt á góðum stjórnarháttum og tekur mið af leiðbeiningum gefnum út af Viðskiptaráði Íslands, Samtökum atvinnulífsins og Nasdaq Iceland. Sérstakur fagaðili á vegum Stjórnvísi annast mat á úttektum til viðurkenninga á „Fyrirmyndarfyrirtækjum um góða stjórnarhætti“. Líkanið sem notað hefur verið er kallað Stjórnarháttademanturinn og var þróað af Dr. Eyþóri Ívari Jónssyni.

Alls hlutu fimmtán fyrirtæki nafnbótina að þessu sinni. Þau eru Arion banki hf., Eik fasteignafélag hf., Íslandsbanki hf., Íslandssjóðir hf., Kvika hf., Landsbankinn hf., Lánasjóður sveitarfélaga ohf., Reginn hf., Reiknistofa bankanna hf., Reitir hf., Stefnir hf., Vátryggingafélag Íslands hf., Vörður hf. og Ölgerðin Egill Skallagríms hf. ásamt Mannvit hf.

Tilgangur viðurkenningarinnar er að ýta undir umræður og aðgerðir til betri stjórnarhátta ásamt því að hvetja fyrirtæki til þess að efla góða stjórnarhætti og skapa þannig aukið traust. Markmiðið er að matsferlið auki trúverðugleika og gagnsæi stjórnarhátta fyrirtækja gagnvart hluthöfum og öðrum hagsmunaaðilum. Í verkefninu felst að öllum fyrirtækjum gefst tækifæri til að undirgangast formlegt mat á starfsháttum stjórnar og stjórnenda sinna. Mannvit er eitt þeirra fyrirtækja sem gefið hafa út ársskýrslu sína á vef fyrirtækisins eða í prentútgáfu í 14 ár, einmitt til þess að auka gagnsæi og trúverðugleika.


Á mynd: Sigurður Sigurjónsson stjórnarformaður Mannvits með viðurkenninguna um góða stjórnarhætti.