Laki og Landsnet vinna að nýsköpunarverkefni - Mannvit.is
Frétt - 11.09.2015

Laki og Landsnet vinna að nýsköpunarverkefni

Laki, rannsóknar- og nýsköpunarfyrirtæki á sviði umhverfisvænna orkulausna sem er að hluta í eigu Mannvit, hefur gert samkomulag við Landsnet um samstarf við þróun á POLG (Power On-Line Generator). Þar með er Landsnet orðinn einn af bakhjörlum þessa spennandi nýsköpunarverkefnis og ætlar að leggja frekari þróun þess lið með það að markmiði að þróa vöru fyrir alþjóðlegan markað.

Markmiðið er að búa til vöru sem eykur rekstraröryggi flutnings- og dreifikerfa raforku, einfaldar eftirlit og viðhaldsvinnu, eykur öryggi starfsfólks og dregur úr slysahættu. Það er fyrirtækið Laki ehf., rannsóknar- og nýsköpunarfyrirtækið á sviði umhverfisvænna orkulausna, sem hefur þróað POLG-verkefnið sem byggist á því að nýta rafsegulsvið háspennulína til raforkuframleiðslu. Um afar vistvæna lausn er að ræða sem er ætlað að skila nægu afli til að aflfæða, eða knýja áfram, hverskyns rafbúnað, svo sem fjarskipta- og eftirlitsbúnað. 

Að baki Laka ehf. standa ráðgjafarfyrirtækin Mannvit hf. og Rásmark ehf. Með samkomulagi sem Guðmundur Ingi Ásmundsson, forstjóri Landsnets, og Sigurjón Magnússon, stjórnarformaður Laka og starfsmaður Mannvits á sviði markaðs og þróunar, undirrituðu á dögunum hefur Landsnet gengið formlega til liðs við Laka í áframhaldandi þróun POLG-lausnarinnar fyrir alþjóðamarkað. Mannvit leggur mikla áherslu á nýsköpun og hefur komið að fjölmörgum nýsköpunarverkefnum á sviði orku hérlendis.

Mynd: Frá vinstri, Óskar H. Valtýsson, Rásmark, Sigurjón Magnússon, Laki og Mannvit, Guðmundur Ingi Ásmundsson, forstjóri Landsnets og Sverrir Jan Norðfjörð, frkstj. Þróunar og tæknisviðs Landsnets.