Víkurhvarf - Mannvit.is
Frétt - 02.01.2015

Rannsóknarstofa Mannvits í Víkurhvarfi 8

Rannsóknarstofa Mannvits hefur nú flutt í Víkurhvarf 8 (neðri hæð) í Kópavogi frá og með 1.janúar 2015. Þar með er öll starfsemi Mannvits flutt frá Grensásvegi 1. 

 

Á stofunni eru gerðar allar hefðbundnar prófanir og margar sérhæfðar prófanir sem tengjast steinefni, steinsteypu, vegagerð, jarðtækni og bergtækni. Einnig eru gerðar stálprófanir og plötupróf. Á efnarannsóknarstofu Mannvits eru gerðar gasgreiningar, efnagreiningar á vatni, greiningar á bergi og tæringarprófanir.

 

Auk allra helstu rannsókna er boðið upp á sérfræðimat og ráðgjöf varðandi túlkun á rannsóknarniðurstöðum og mat á því hvort efni standist þar til gerðar kröfur. Jafnframt er boðið upp á aðstoð við framleiðslu- og framkvæmdaeftirlit. Mannvit starfrækir einnig rannsóknarstofu á starfsstöð félagsins á Akureyri.

 

Stjórnkerfi rannsóknarstofunnar er vottað samkvæmt kröfum gæðastjórnunarstaðalsins ÍST EN ISO 9001:2008, umhverfisstjórnunarstaðalsins ISO 14001:2004 og vinnuverndar- og öryggisstjórnunarstaðalsins OHSAS 18001:2007. Fylgt er kröfum ÍST EN ISO/IEC 17025:2005 um almennar kröfur varðandi hæfni prófunar- og kvörðunarstofa. Rannsóknarstofan hefur fengið vottun frá Kontrollrådet í Noregi og hefur þar með leyfi til gera prófanir fyrir norskan markað.