Fráveitur og ofanvatnslausnir

Mannvit býr yfir yfirgripsmikilli reynslu af hönnun fráveitna fyrir bæði opinbera aðila og einkaaðila. Verkefnin ná m.a. til hreinsistöðva, skólpdælustöðva, fráveitulagna, blágrænna ofanvatnslausna, sökkræsa, útrása, fóðrun fráveitulagna og tilraunir með náttúruleg fráveitukerfi.

Mannvit sérhæfir sig einnig í flóðvörnum, m.a. gerð flæðilíkana, ofanflóða vörnum, settjarna fyrir ofanvatn, blágrænna ofanvatnslausna, og umhverfismati.  Ofanvatnslausnir létta álagi af fráveitukerfum í mikilli úrkomu.  Blágrænar ofanvatnslausnir stuðla að gróðurríkara og fjölbreyttara umhverfi og henta jafnt í þéttbýli sem dreifbýli.  Slíkar lausnir eru stór þáttur í því að skapa sjálfbært samfélag, þar sem hönnunin tekur tillit til vistkerfis, plöntuvals og vatnsgæða þess umhverfis sem verið er að vinna með hverju sinni.

Á þessum sviðum hefur Mannvit áratuga reynslu og hefur sinnt fjölmörgum verkefnum af öllum stærðum og gerðum.   Lausnirnar taka mið af síauknum kröfum laga og reglugerða um hreinsun og er nýjustu tækni beitt svo mengun sé haldið innan leyfilegra marka með hagkvæmum lausnum.

Við önnumst jafnframt ástandskönnun eldri raf-, stjórn- og vélbúnaðar dælu- og hreinsistöðva og vinnum hættugreiningu vinnsluferla og gerum tillögur um viðhald og endurbætur því tengdar.

Þjónusta við fráveitur

• Kerfisgreiningar lagnakerfa í tölvulíkönum
• Forhönnun og hönnun kerfa, lagna, vélbúnaðar, stýringa og fjarvöktunar
• Gerð útboðsgagna, verkefnastjórnun og eftirlit með framkvæmdum
• Prófun og gangsetning dælustöðva og stjórnkerfa
• Uppsetning á innra eftirlitskerfi fráveitu
• Mælingar í fráveitukerfum
• Viðhald og endurnýjun kerfa
• Jarðfræðirannsóknir vegna framkvæmda við fráveitumannvirki

Kerfisgreining fráveitu

Með kerfisgreiningu er líkt eftir veitunni í tölvulíkani svo hægt sé að svara ýmsum spurningum eins og;

• Hvaða áhrif hefur nýtt hverfi á núverandi veitu?
• Er hægt að lækka rekstrarkostnað?
• Við hvaða aðstæður er hætta á að það flæði upp úr fráveitukerfum inn í kjallara eða upp á yfirborð?

Mannvit notar hugbúnaðinn  MIKE URBAN við kerfisgreiningar á fráveitum. Niðurstöður kerfisgreininga eru síðan notaðar til ákvörðunar um hugsanlegar úrbætur, breytingar og viðbætur.

Vatnamælingar og skyld rannsóknarþjónusta fyrir fráveitur

Mannvit býður uppá víðtæka þjónustu á sviði vatnamælinga og skyldrar rannsóknarþjónustu.  Einkum er um að ræða rennslismælingar og mælingar á eðlis- og efnaeiginleikum vatns og vatnsgæðum en einnig aðrar mælingar sem nauðsynlegar eru við úrlausn verkefna hverju sinni, t.d. veðurmælingar.

Mælingar á rennsli og hitastigi fráveituvatns auk vatnshæðar í yfirfalls- og dælubrunnum hafa verið gerðar í tengslum við skoðun á afköstum og rekstrartruflunum í fráveitukerfum nokkurra sveitarfélaga. Samhliða rennslismælingum hafa einnig farið fram mælingar á grunnvatnshæð, úrkomu og lofthita en með þeim má meta áhrif grunnvatnsstöðu á rennsli í viðkomandi fráveitukerfi, reikna magn ofanvatns og meta afrennslisstuðla og samrennslistíma mældra svæða.