Verkefnastjórnun og verkefnagát

Mannvit býður uppá verkefnastjórnun á öllum stigum framkvæmda. Mannvit sinnir verkefnastýringu margra og fjölbreyttra verkefna, tengt verkfræðilegri hönnun en einnig á öðrum sviðum, allt frá þróunarverkefnum til framkvæmdaverkefna þar sem þekking og reynsla verkefnisstjóra Mannvits spannar breitt svið.

Markviss verkefnastýring tryggir heildaryfirsýn á öllum stigum verkefnis frá undirbúningi, í hönnunarfasa og yfir framkvæmdartímann og skapar betri möguleika á því að einstaka verkþættir og verkefnið í heild haldist innan skilgreinds tíma- og kostnaðarramma með skilgreindu umfangi og gæðum. Í krefjandi umhverfi er mikilvægt að hafa öfluga verkefnisstjórn.

Verkefnastjórnun

Verkefnastjóri vinnur í samvinnu með viðskiptavinum og hagsmunaaðilum verkefnisins að skilgreindu markmiði. Verkefnastjóri sér m.a. um gerð og eftirfylgni áætlana (t.d. verk-, tíma-, mannafla- og kostnaðaráætlanir), skilgreiningu á umfangi verkefnisins og einstökum verkþáttum, skipulag og upplýsingagjöf til allra hagsmuna aðila, meta og skoða áhættu og tækifæri, breytingastjórnun, tryggja gæði og stuðla að opnum samskiptum í verkefnateyminu. Verkefnisstjóri vinnur með verkfæri úr verkfærakistu verkefnisstjórans. Í verkfærakistunni eru þaulreyndir ferlar, sniðmát, flæðirit og forrit sem verkefnisstjórinn velur fyrir hvert verkefni.

Verkefnagát

Verkefnagát er vaxandi þáttur í starfsemi Mannvits. Verkefnagát er hluti af verkefnisstjórn og sér m.a.  um gerð og eftirfylgni með áætlunum og mat á verkframvindu. Metin er framvinda sem veitir upplýsingar um unnið virði (earned value), þ.e. hvar verkefnið er statt miðað við kostnaðar- og tímaáætlanir. Reiknaðir eru frammistöðuvísar kostnaðar (CPI, Cost Performance Index) og tímaáætlunar (SPI, Schedule Performance Index), þ.e. hvort verkefnið er undir eða yfir kostnaðar- og tímaáætlun.  Útreikningur á hver verður líklegur endanlegur kostnaður og verklok verkefnisins er gerður reglulega á meðan verkefnið stendur yfir.

Aukin eftirspurn er eftir þjónustu verkefnagátar frá lánastofnunum, sem setja í ríkara mæli kröfu um verkefnagát á þau verk sem þær fjármagna.